3 Junie 2024
President Cyril Ramaphosa het sy medelye betuig met diegene wat geliefdes verloor het weens die vloede wat tans die Oos-Kaap teister.
Foto’s en videos word tans wyd versprei van vloedskade in die Nelson Mandelabaai-metro, Buffalo City, Kariega en omliggende gebiede.
Volgens berigte is sewe mense dood en meer as 1 000 moes uit hulle huise ontruim word. In sommige berigte word die dodetal op 10 gereken.
Ramaphosa sê hy dink ook aan die naasbestaandes van diegene wat as vermis aangemeld is.
Hy sê mens besef opnuut die skade wat aangerig kan word weens natuurrampe. Volgens hom kan die skade opgelos word indien almal saamwerk.
Ramaphosa het owerhede in die Oos-Kaap bedank vir die werk wat hulle tot dusver gedoen het om die skade te probeer beperk.
Intussen sê die DA se Andrew Whitfield dat hy reeds kontak gemaak het met die Oos-Kaap se premier, Oscar Mabuyane om die gebied tot ‘n rampgebied te verklaar.
