14 Desember 2022
Die Lughawemaatskappy van Suid-Afrika, ACSA, sê die uitdagings wat hy vroeër vanjaar ervaar het met brandstoftekorte vir vliegtuie is iets van die verlede.
Vroeër vanjaar is brandstoftekorte by die Kaapstadse- en die OR Tambo Internasionale Lughawe ervaar toe die brandstofreserwes tot kritiek-lae vlakke gedaal het en vliegtuie herlei is om elders brandstof in te neem.
Die tekorte is onder andere veroorsaak deur die oorstromings in KwaZulu-Natal en onstuimige weerstoestande wat veroorsaak het dat ‘n skip nie kon vasmeer met ‘n besending brandstof wat vir Kaapstad bestem was nie.
Die hoof uitvoerende beampte van ACSA, Mpumi Mpofu, het passasiers verseker dat daar geen probleme tydens die piek-seisoen in die vooruitsig gestel word nie.
