‘n Vlieënier is dood toe die eensitplek-vliegtuig waarmee hy gevlieg het, vroeër Saterdagmiddag (12 April) in ‘n veld in die Boschkop-omgewing in Pretoria neergestort het.
Volgens Arrive Alive is hul vrywillige mediese noodreaksiespan net na 16:00 vanmiddag na die toneel ontbied. Met hulle aankoms op die toneel het hulle die man dood verklaar.
Die Marksmen Akrobatiese-span, het intussen op Facebook bevestig dat dit een van sy vliegtuie was, wat in die ongeluk betrokke was, maar dat die vlieënier nie ‘n lid van die span was nie.
Die span het aan Netwerk24 gesê hulle weet nie in hierdie stadium wie die vliegtuig gevlieg het nie, omdat die betrokke vliegtuig deels deur een van hulle lede en iemand anders besit word.
Die polisie en die burgerlugvaartowerheid ondersoek die omstandighede van die ongeluk.
Foto: Arrive Alive
