18 Januarie 2022
Die VF Plus het vanoggend se hofbeslissing, dat die matriekuitslae wél in die media gepubliseer gaan word, verwelkom.
Die VF Plus LP en hoofwoordvoerder oor basiese onderwys, dr. Wynand Boshoff sê hoewel verpersoonlikte massakommunikasie dit maklik maak om uitslae direk aan kandidate te verskaf, is daar steeds ʼn groot behoefte aan gepubliseerde uitslae.
LEES OOK: HOF BESLIS MATRIEKUITSLAE MAG GEPUBLISEER WORD
Hy meen benewens die feit dat dit vir matrikulante, hul familie en vriende belangrik is om hul eksamennommers en uitslae in die koerant te sien, is dit ʼn goeie refleksie van skole, distrikte en provinsies wat hard gewerk het om leerders te help om sukses te behaal.
AfriForum en Maroela Media het dié aansoek gebring.
Boshoff sê vir elke positiewe emosie rakende matriekuitslae, is daar ook negatiewe emosies. Druipelinge, sowel as skole, distrikte en provinsies wat swak vaar, kan gepubliseerde matriekuitslae as ‘n vernedering beleef. “Die vraag ontstaan of dít nie die ware rede was vir die aanvanklike besluit om uitslae nié te publiseer nie en dat die Popi-wet bloot as verskoning voorgehou is.”
LEES OOK: UMALUSI KEUR MATRIEKUITSLAE GOED; ONDERSOEK ONREËLMATIGHEDE
Hy sê indien huiwering om matrikulante se privaatheid deur publikasie van die uitslae te skend wel die probleem was, is dit positief dat regsekerheid hieroor verkry is.
In die tussentyd het die gehaltebeheerraad vir basiese onderwys, Umalusi, die uitslae van 2021 goedgekeur. Die uitslae word Donderdag, 20 Januarie gepubliseer.
