6 April 2022
Die VF Plus het die ontwrigting van noodsaaklike munisipale dienste deur – soos hy dit noem – ongedissiplineerde en gewelddadige stakers van die JB Marks-plaaslike munisipaliteit, ten sterkste veroordeel.
Optrede wat uit die staking – in dorpe soos Potchefstroom en Ventersdorp – voortspruit, word gekenmerk deur intimidasie, vandalisme van munisipale eiendom en die verlamming van nooddienste in die dorp.
Volgens die party se LPW, Fanie du Toit, is van die brandweerstasies onbeman en dit blyk dat lede van ander nooddienste – soos gemeenskapsveiligheid – hulle by die stakers aangesluit het.
Hy sê daar was selfs pogings om lede van die publiek en nie-stakende amptenare by die stad se lisensiekantoor aan te hou.
Daar is intussen gereël dat die plaaslike weermagbasis se brandweer op ʼn gereedheidsgrondslag geplaas word om die gemeenskap by te staan.
