19 Mei 2021
‘n Gemanipuleerde foto van die VF Plus se kandidaat in die tussenverkiesing in wyk 44 in Pretoria is vanaf ‘n Facebookblad versprei wat na alle waarskynlikheid geskep is met die doel om dié kandidaat se naam te beswadder.
Dié foto beeld vir Nick Pascoe in ‘n EFF-hemp uit. Die foto wat egter gebruik is, is die van Cobus Roode wat in aanloop tot die 2014-verkiesing by die EFF aangesluit het.
Pascoe was nooit `n lid van die EFF nie. Die plasing, waarin gevra word hoe lank Nick die gemeenskap gaan verteenwoordig voor hy “weer na `n ander party oorloop” is die enigste plasing op dié blad. Die plasing is ook geborg (sponsor) wat beteken dat daar geld bestee is om die plasing ‘n groter reikwydte te gee. Die Facebookblad is intussen gesluit.
‘n Woordvoerder van die Vryheidsfront Plus, Wouter Wessels sê diegene wat hiervoor verantwoordelik is pleeg baie vuil politiek.
Hy meen dit is duidelik dat dit ‘n gemanipuleerde foto is. “Die VF Plus groei en ons opponente raak bekommerd. Opponente sal nie geld bestee indien hulle nie die VF Plus as ‘n bedreiging gesien het nie”.
