17 Januarie 2023
Die VF Plus het ʼn skrywe gerig aan die premier van die Vrystaat, Sisi Ntombela, waarin aangedring word op dringende ingryping in die voortslepende waterkrisis in Parys.
Inwoners in die Ngwathe-plaaslike munisipaliteit het gister betoog oor die waterkrisis.
Volgens die VF Plus-LP en kiesafdelingshoof in die munisipaliteit, Tammy Breedt het die krisis daartoe gelei dat klinieke, hospitale en skole in die gebied reeds vir drie weke aaneenlopend sonder water is.
Sy sê in reaksie op die VF Plus se skrywe het die premier bevestig dat die nasionale departement van water en sanitasie genader word om hulp te verleen ten opsigte van die waterkrisis.
Sisi het onderneem om te versoek dat watertenk-waens in Parys, Skonkenville en Thumahole beskikbaar gestel word en die weermag ook genader word om hulp te verleen.
