3 September 2021
Die VF Plus sê in ‘n verklaring dat belastingbetalers – volgens hulle – weer gestraf word vir die wanbestuur van die Emfuleni-plaaslike munisipaliteit nadat die hof gister aan Eskom ’n summiere vonnis van R1,3-miljard teen die munisipaliteit toegestaan het.
Die bedrag is deel van Emfuleni se historiese skuld van R1,9-miljard aan die kragvoorsiener wat sedert 2019 opgehoop het. Die munisipaliteit se skuld aan Eskom tot op hede is R3,5-miljard.
Die VF Plus-raadslid in die munisipaliteit, Gerda Senekal sê dit is onwaarskynlik dat Emfuleni die geld sal kan betaal aangesien hy nie eers die vorige terugbetalingsooreenkomste aan Eskom kon eerbiedig nie.
Eskom het in Maart 2016 ʼn hofbevel bekom vir ʼn uitstaande rekening van meer as R600-miljoen. In 2020 het Eskom op die munisipaliteit se roerende bates beslag gelê waarna ooreengekom is dat Emfuleni R183-miljoen per maand sal betaal om sy skuld aan Eskom te verminder.
Senekal meen die Emfuleni-munisipaliteit, wat deur die Gautengse regering onder gedeeltelike administrasie geplaas is, word as een van die swakste munisipaliteite in die land gereken.
“Die munisipaliteit ontvang ʼn gemiddelde inkomste van R350-miljoen per maand, maar die geld word aan krediteure betaal wat in die vorige finansiële jaar nie betaal is nie. Eskom se aanslag op Emfuleni is maar net die begin van skuldeisers wat op betaling aandring. Randwater se uitstaande rekening beloop R1,5 miljard,” sê Senekal.
Stem vir die Aitsa’s
