10 Junie 2021
’n Verdagte wat beskuldig word op twee aanklagte van seksuele aanranding en een klag van verkragting, het gister in die landdroshof in Reitz in die Vrystaat verskyn.
AfriForum se bestuurder van veldtogte, Jacques Broodryk sê dié stap kom ná volgehoue druk deur die organisasie se privaatvervolgingseenheid. Volgens Broodryk is die eenheid in Oktober 2019 deur ’n familielid van ’n 5-jarige dogtertjie genader, wat na bewering deur die verdagte gemolesteer is.
Die Direkteur van Openbare Vervolgings het egter besluit om nie die verdagte te vervolg nie, waarna AfriForum se privaatvervolgingseenheid vasgestel het dat die polisie glo nooit die saak behoorlik ondersoek het nie.
Volgens hom het die DOV besluit om die saak te heropen weens verskeie getuies in die saak se weergawes, wat glo nooit deur die polisie bekom is nie.
Broodryk sê alhoewel die verdagte steeds nie vervolg word vir die molestering van die kind nie, het die ondersoek bevind dat hy betrek kan word by verskeie ander soortgelyke oortredings, waarvan hy nou formeel aangekla is.
