22 April 2021
Dele van Roodepoort is vroeër vandag in duister gehul nadat ‘n vermeende kabeldief by die substasie in Pennyville kabels probeer steel het.
Die verdagte het glo probeer om ‘n 11-duisend-Volt kabel deur te saag toe hy doodgeskok is. Gereedskap is langs hom op die toneel gevind.
Tegnici van die Johannesburgse nutsmaatskappy, City Power het die ontdekking gedoen nadat hulle ontbied is om die oorsaak van ‘n kragonderbreking te bepaal.
Volgens City Power se woordvoerder, Isaac Mangena word voorvalle van kabeldiefstal betreur omdat dit verbruikers verontrief en ook omdat dit miljoene rand skade elke jaar beloop.
Die bestuur van City Power het hul medelye aan die oorledene se naasbestaandes betuig. Intussen blyk dit asof die kragtoevoer teen laatmiddag herstel is.
