13 Desember 2023
‘n Man het uiteindelik in die hof verskyn, 18 maande ná die dood van ‘n kitskosafleweraar, Motheo Madihlaba op 16 April 2022 in Middelburg.
Jonas Moedigi Sebati het vandag vir die eerste keer in die Landdroshof op Middelburg verskyn op aanklagte van strafbare manslag en bestuur onder die invloed van drank.
AfriForum se privaatvervolgingseenheid is in Mei verlede jaar deur Madihlaba se familie om hulp genader weens die saak wat volgens hulle gesloer het. Madihlaba was op die betrokke dag op pad om kos te gaan aflewer toe Sebati na bewering twee voertuie op ’n sperstreep verbygesteek en trompop teen Madihlaba op sy bromponie gebots het.
Madihlaba is op die toneel dood verklaar.
Die eenheid se Barry Bateman sê daar is intussen vasgestel dat hoewel Sebati op die ongelukstoneel in hegtenis geneem is, het die polisie hom later op borg van R1 500 vrygelaat, en aangesê om in April 2023 weer by die Suid-Afrikaanse Polisiediens aan te meld.
“Die eenheid het sedert Mei verlede jaar aan die Nasionale Vervolgingsgesag (NGV) geskryf om te bepaal waarom die verdagte nog nie in die hof verskyn het nie. Daar is aangevoer dat die ondersoekbeampte steeds op die uitslag van die bloedalkoholvlaktoets wag.”
Die saak is uitgestel tot 29 Januarie 2024 vir blootlegging van die dossier aan die verdediging.
