19 Januarie 2022
Die Wes-Kaapse Hooggeregshof het beveel dat die aanhouding van die vermeende brandstigter van die parlement, Zandile Mafe in die Valkenberg-psigiatriese hospitaal, onwettig is en dat hy vandag na ‘n gewone gevangenis oorgeplaas moet word.
Dit volg nadat Mafe se regspan geappelleer het teen ‘n vorige hofbevel waarvolgens hy vir sielkundige waarneming van 30 dae gestuur is. Hy is vroeër met paranoïse skisofrenie gediagnoseer.
Mafe sal Saterdag om borgtog aansoek doen, maar sal waarskynlik nie self in die hof kan wees nie, aangesien hy met Covid-19 gediagnoseer is en in self-afsondering sal wees.
Mafe is van ‘n skedule ses oortreding aangekla, wat beteken dat hy sal moet bewys dat hy vertrou kan word om weer in die hof te verskyn indien hy op borgtog vrygelaat word. Intussen is verneem dat die Valke se eenheid vir misdaad teen die staat blykbaar in besit is van beeldmateriaal wat toon hoe Mafe die brand in die parlement gestig het. Die beeldmateriaal toon glo hoe Mafe ‘n vloeistof uitgooi en aan die brand steek.
