2 September 2022
Die Outomobiel Assosiasie – die AA – sê voorlopige data dui daarop dat Suid-Afrikaners vanaf volgende week verligting by die petrolpompe kan verwag.
Volgens die AA dui data deur die Sentrale Energiefonds, wat nog nie geoudit is nie, daarop dat die brandstofprys aansienlik kan daal, wanneer September se pryse die 7de September in werking tree.
Die AA se woordvoerder, Layton Beard sê 95- en 93-oktaan petrol kan onderskeidelik met R2,35 per liter en R2,18 per liter daal. Diesel kan met tussen 77- en 88 sent per liter daal.
Ook Paraffien kan 82-sent per liter goedkoper word. Beard sê indien die rand bestendig bly teen die Amerikaanse dollar sal verbruikers teen volgende week ‘n groot sug van verligting slaak.
