1 Maart 2023
Die burgerregteorganisasie AfriForum sê hy beskou die plan om die tydperk vir die uitbetaling van die omstrede R350 Covid-19 maatskaplike noodverligtingstoelae tot in 2024 te verleng as niks meer as ’n verkiesingsfoefie nie.
Die veldtogtebeampte vir strategie en inhoud by AfriForum, Ernst van Zyl sê die organisasie hou vol dat die uitbetaling van hierdie toelae veral nie verleng moet word nie, aangesien dit ’n uitgawe is wat die regering eenvoudig nie kan bekostig nie.
Die organisasie het vandag skriftelike kommentaar oor die kwessie by die departement van maatskaplike ontwikkeling ingedien om hierdie plan teen te staan.
“Hierdie tekort is hoofsaaklik te wyte aan ’n oormaat staatsuitgawes, waarvoor daar geen fondse beskikbaar is nie as gevolg van faktore soos ongebreidelde korrupsie, spandabelrigheid en wanbestuur van fondse,” sê Van Zyl.
Hy meen die Covid-19-maatskaplike noodverligtingstoelaag van R350 per maand is een van hierdie oormatige uitgawes wat die regering eenvoudig nie kan bekostig om vir langer as die tydperk waarvoor dit bedoel was te betaal nie.
Van Zyl meen die toename in armoede en werkloosheid wat die afgelope paar jaar waargeneem is, het minder met die Covid-19-pandemie te doen gehad, en meer te doen met die regering se wisselvallige inperkingsbeleide en die korrupsie en plundering wat met hierdie beleide verband hou en ongestraf bly.
