29 Mei 2023
Rudi Gericke, die veespekulant wat daarvan aangekla word dat hy ‘n boer van die Ficksburg-distrik, Evan Sourour, doodgeskiet het, het sy borgtogaansoek in die plaaslike landdroshof laat vaar.
Gericke, wat maande in die hospitaal was nadat hy self ook tydens die oor-en-weer-skietery gewond is, het die aansoek te midde van sterk teenstand uit die gemeenskap laat vaar.
‘n Aanlyn-petisie – wat daarop aandring dat hy in aanhouding bly hangende sy verhoor – het nagenoeg 14 000 handtekeninge opgelewer terwyl verskeie lede van die gemeenskap, boere en selfs minibus-taxibestuurders by sy vorige hofverskyning opgedaag het om beswaar aan te teken teen borgtog.
Sy regsverteenwoordiger, advokaat Willem Edeling, het aangevoer dat hulle nie verdere spanning van ‘n borgtogaansoek op Gericke wil plaas nie en eerder daarop sal fokus dat hy die beste moontlike behandeling in die tronk sal kry.
Gericke word tans in die gevangenis op Kroonstad aangehou en moet weer op 20 Junie in die hof verskyn.
