19 April 2021
‘n Verdagte is in hegtenis geneem in verband met die verwoestende brand wat in Kaapstad woed.
Die burgemeesterkomiteelid belas met veiligheid en sekuriteit, JP Smith sê daar is baie gerugte oor die oorsaak van die brand en of dit ‘n geval van brandstigting is, maar dit sal alles deel vorm van die ondersoek.
Volgens Smith is die verdagte deur ‘n lid van die publiek gewaar en is hy met behulp van sy seuns en die familie se honde aangekeer.
Die brand, wat in die omgewing van die Rhodes Monument ontstaan het, het reeds miljoene rand se skade veroorsaak. Geboue van die Universiteit van Kaapstad asook by die Rhodes Monument is in puin gelê en inwoners van Vredehoek is gevra om hulle huise te ontruim.
‘n Sterk wind jaag die vlamme aan en verhoed tans dat brandbestryders lugsteun kan bied.
Twee brandbestryders is beseer.
