28 Februarie 2023
Die veelpartykoalisie in die Tshwane-metro in Pretoria sê hulle is teleurgesteld dat die Cope-raadslid, Murunwa Makwarela, tot die nuwe burgemeester van die metro verkies is.
Makwarela het vandag tydens ‘n spesiale raadsvergadering 112 stemme op hom verenig terwyl die veelpartykoalisie se burgemeesterskandidaat, Cilliers Brink, 101 stemme ontvang het.
Luidens ‘n verklaring van die veelpartykoalisie hou hy steeds die meerderheid setels in die raad. Hulle is daarom van mening dat geheime stemmings, soos wat vandag plaasgevind het, veroorsaak dat omkopery in munisipale rade plaasvind.
Al die partye in die veelpartykoalisie beplan nou om saam te werk om te bepaal wie diegene was wat teen die wense van die koalisie gestem het én hulle te verwyder. Die veelpartykoalisie is ook na bewering van plan om ‘n mosie van wantroue in Makwarela te bring.
