Die veelparty-koukus in Kaapstad sê hy beplan om ‘n debat oor ‘n mosie van wantroue in die speaker van Kaapstad, Felicity Purchase, aan te vra.
Dié koukus – wat uit onder meer die ANC, GOOD, die EFF, Al Jama-ah en die PA bestaan – het aangekondig dat daar tydens ‘n mediakonferensie om 11:00 vanoggend meer besonderhede hieroor bekend gemaak sal word.
Purchase – wat in Mei 2021 tot speaker verkies is – het verlede maand onder kritiek deurgeloop omdat sy die eerste raadsvergadering van die jaar as ‘n virtuele vergadering belê het.
Opposisiepartye het haar daarvan beskuldig dat sy vir JP Smith en Xanthea Limberg probeer skerm nadat die polisie tydens ‘n klopjag op hul elektroniese toestelle beslag gelê het – as deel van ‘n strafregtelike ondersoek.
