15 April 2024
Lede van AfriForum Jeug het ‘n beroep op president Cyril Ramaphosa gedoen om die omstrede wysigingswetsontwerp op basiese onderwyswette, oftewel die BELA-wet te skrap.
As simbool van die uitwissing waarop aangedring word, het lede van die jeugorganisasie met swartboorde met die woorde: I am a donkey en ‘n groot uitveër vanoggend na die Uniegebou opgeruk.
AfriForum Jeug se woordvoerder, Louis Boshoff sê hulle het ook ‘n memorandum aan Ramaphosa gerig waarin die organisasie hul teenkanting teen die wetsontwerp uiteensit.
Volgens AfriForum Jeug herinner die BELA-wetsontwerp aan die verengelsingsbeleid wat Britse owerhede kort ná die Anglo-Boereoorlog in skole toegepas het. As deel van dié beleid is kinders verneder indien hulle Afrikaans by die skool gepraat het.
Boshoff sê die organisasie voer ondermeer in die memorandum aan dat die BELA-wetsontwerp ’n direkte aanval op moedertaalonderrig in die algemeen is, en ’n indirekte aanval op Afrikaans as onderrigtaal. Hy meen indien die wetsontwerp in sy huidige vorm aanvaar sou word, sal die toepassing daarvan op kulturele etniese suiwering neerkom.
Hy sê die BELA-wetsontwerp laat Afrikaanse jongmense warm onder die kraag.
