18 Julie 2024
Indien die Phala Phala-aangeleentheid nou in die parlement sou opduik, sal die DA hom agter president Cyril Ramaphosa skaar.
Volgens die leier van die DA, John Steenhuisen, verdwerg die VBS-skandaal – waarby die EFF-leiers, Julius Malema en Floyd Shivambu betrek word – die Phala Phala-kwessie.
Steenhuisen sê die DA sal eerder sy kans met Ramaphosa vat as om die EFF die geleentheid te gee om die regering – waarvan die DA onder die RNE deel vorm – tot ‘n val te bring.
Volgens Steenhuisen sal hulle die Phala Phala-aangeleentheid hanteer, afhangende van die vorm waarin dit in die Parlement opduik. Phala Phala is in die kollig gewerp nadat daar meer as ‘n halfmiljoen dollar uit ‘n rusbank op die president se Bosveldplaas gesteel is.
Die Grondwethof het die EFF tot Vrydag kans gegee om sy hofstukke in te dien waarin hy vra dat die land se hoogste hof die parlement se vroeëre verwerping van ‘n onafhanklike paneel se verslag oor dié aangeleentheid, ter syde stel.
