6 September 2024
Die DA sê die minister van justisie en staatkundige ontwikkeling, Thembi Simelane kan nie in die pos bly terwyl daar ondersoek ingestel word oor haar beweerde betrokkenheid by die VBS-skandaal nie.
Die DA-LP, advokaat Glynnis Breytenbach het voor die parlementêre portefeuljekomitee oor justisie en staatkundige ontwikkeling gesê indien Simelane in die pos bly is dit botsende belange aangesien sy as minister ‘n invloed op die Nasionale Vervolgingsgesag het.
LEES OOK: Minister moet voor die ANC se integriteitskommissie verskyn oor VBS-skandaal
Dit het vroeër aan die lig gekom dat Simelane na bewering ‘n sogenaamde lening van meer as R570 00 van Gundo Wealth Solutions ontvang het om ’n koffiewinkel te koop.
Sy was toe die burgemeester van die Polokwane-munisipaliteit, wat R394-miljoen in die VBS Bank belê het. VBS het glo omkoopgeld aan Gundo betaal.
LEES OOK: Ramaphosa eis antwoorde by minister oor VBS
Simelane het erken dat sy ’n lening van R575 600 ontvang het, maar hou vol dat sy die bedrag plus rente, van R250 000 terugbetaal het. Drie terugbetalings het tussen 1 Oktober 2020 en Januarie 2021 geskied.
