26 Augustus 2021
Die VF Plus sê hy verwelkom die uitspraak van Limpopo se hooggeregshof in Polokwane/ Pietersburg wat twee lewenslange vonnisse aan Mpho Mbuyane opgelê het vir die dubbele moord op die egpaar Piet en Tilla van Zyl.
Die egpaar is op 20 Augustus 2017 op hul wildsplaas Kalkpoort buite Zebediela in die Immerpan-distrik vermoor.
Mbuyane is ʼn verdere 15 jaar gevangenisstraf opgelê vir huisroof.
Die VF Plus se lid van die provinsiale wetgewer in Limpopo asook die provinsiale leier, Marcelle Maritz het namens die party die onderskeie wetstoepassers bedank vir hulle harde en onvermoeide werk wat tot die inhegtenisneming van Mbuyane gelei het.
“Hierdie is ʼn bewys dat die samewerking tussen die polisie, die gemeenskap, private sekuriteitsmaatskappye en die howe belangrik is om die euwel van plaasaanvalle en -moorde uit te roei.”
Die VF Plus spreek sy hoop uit dat die swaar strawwe wat howe aan sulke oortreders oplê, sal dien as afskrikmiddel vir ander wat soortgelyk misdade beplan.
Hou Afrikaans op die lug
