31 Julie 2023
Die Valke het ‘n betaling van R23-miljoen van ‘n Vrystaatse munisipaliteit aan ‘n veiligheidsmaatskappy gekeer – nadat daar sprake was van bedrog, korrupsie en die oortreding van die Wet op Munisipale Finansiële Bestuur.
Lede van die Valke se span wat klagtes van ernstige korrupsie in Welkom ondersoek is gevra om die moontlike verontagsaming van verkrygingsreëls te ondersoek – wat met die Matjhabeng-plaaslike munisipaliteit se aanstelling van die maatskappy verband hou.
Volgens ‘n woordvoerder van die Vrystaatse Valke, luitenant-kolonel Zweli Mohobeleli, het ondersoeke aan die lig gebring dat die maatskappy sonder ‘n kontrak aangestel is.
Mohobeleli sê slegs ‘n aanstellingsbrief is gevind – wat bevestig dat die sekuriteitsmaatskappy vir ‘n tydperk van drie maande aangestel sou word – en dat die maatskappy na meer as twee jaar steeds vir die munisipaliteit werk.
Dié sekuriteitsmaatskappy is tot dusver sowat R26-miljoen deur die munisipaliteit betaal.
