19 Februarie 2024
“Weens die harde werk en deursettingsvermoë van Valke-lede kon verskeie nasionale prioriteitsmisdade opgelos word.”
Dit volgens die hoof van die Valke, luitenant-generaal Godfrey Lebeya, wat vanoggend ‘n mediakonferensie gehou het oor die Valke se prestasie tydens die derde kwartaal, wat strek tussen Oktober en Desember van 2023.
Hy sê in hierdie tydperk is 705 individue en 19 ondernemings vasgetrek vir verskeie misdade.
229 van dié groep is reeds skuldig bevind en gevonnis. Bedrog het bygedra tot die meeste skuldigbevindings. Die onwettige handeldryf met edelmetale en diamante het die tweede meeste skuldigbevindings, gevolg deur geldwassery.
Lebeya het die fokus ook geplaas op die Valke se ondersoek van aanvalle teenoor polisiebeamptes. Gedurende die tydperk is 22 polisiebeamptes vermoor, en het die Valke 12 mense in hegtenis geneem.
Drie van hierde mense is reeds skuldig bevind en gevonnis.
‘n Tweede besprekingspunt was misdade teenoor die staat, wat die 2021-onluste in KwaZulu-Natal en Gauteng insluit. Volgens Lebeya is een van die opstokers in hegtenis geneem en gevonnis. Dit na aanleiding van ‘n video wat versprei is waarin mense aangemoedig is om die “Brookside-inkopiesentrum in Pietermaritzburg af te brand.”
Hy sê die persoon wat die video geskep het, Mdumiseni Khetha Zuma is in Augustus 2021 in hegtenis geneem. Die 36-jarige Zuma is in November verlede jaar tot 12 jaar gevangenisstraf gevonnis. Volgens Lebeya het al 65 vermeende aanhitsers reeds in die hof verskyn op aanklagte van die aanhitsing tot geweld, en terreur is onlangs tot die klagstaat gevoeg.
Al die verdagtes is op borgtog vrygelaat en die saak duur op 8 April voort.
