28 Oktober 2024
Die onderwysvakbond, SADTU is vasbeslote dat sy beplande betoging nie die matriekeksamen sal ontwrig nie.
SADTU-lede gaan Woensdag teen moontlike werkbesnoeiings in die sektor buite die parlement betoog, wanneer die minister van finansies, Enoch Godongwana, die mediumtermynbegrotingsrede ter tafel lê.
Die regering het ingestem tot ‘n 7,5% loonverhoging vir onderwysers en ander staatsamptenare vir 2023/24, maar het nie provinsiale begrotings dienooreenkomstig verhoog nie.
Die Wes-Kaapse onderwysdepartement het in September aangekondig dat hy sowat 2 400 onderwysposte in die provinsie gaan besnoei weens ‘n begrotingstekort van R3,8-miljard.
Ander provinsies sal na verwagting soortgelyke besnoeiings in die gesig staar.
