16 Oktober 2024
Die Universiteit van Pretoria sê hy sal ondersoek instel na klagtes van rassisme oor ‘n lesing wat die leier van die EFF, Julius Malema, by sy Hatfield-kampus gelewer het.
Dit kom nadat die leier van die VF Plus, dr. Pieter Groenewald sy ontevredenheid uitgespreek het omdat die omstrede lied, “Kill the Boer” tydens dié lesing gesing is.
‘n Woordvoerder van die universiteit, Sashlin Girraj sê dié instelling keur enige vorm van aanhitsing tot geweld, diskriminasie of rassisme by enige van sy kampusse af.
Girraj sê dat die genoemde optrede indruis teen die waardes van die universiteit terwyl daar gepoog word om ‘n veilige omgewing te skep vir alle besoekers, personeel en studente.
Nog ‘n woorvoerder, Rikus Delport het aan Pretoria FM gesê dat die UP dit duidelik wil maak dat die universiteit nié sal skroom om op te tree teen enige individu of groep wat die universiteit se beleid en reëls oortree nie. “Enige persoon wat betrokke is by gedrag wat ons samelewing benadeel of skade aandoen, sal ingevolge die universiteit se dissiplinêre prosedures verantwoordelik gehou word.”
Delport sê dit is ook belangrik om te onthou dat dit nie ontwettig is vir enige politieke organisasie om studente toe te spreek nie.
