13 Oktober 2023
Die Raad vir Gehalteversekering in Algemene en Verdere Onderwys en Opleiding, oftewel Umalusi het verklaar dat 2023 se matriekeindeksamen voort kan gaan.
921 000 matriekleerlings sal aan vanjaar se eksamen deelneem wat op30 Oktober begin. Dit sal op 5 Desember klaarmaak.
Die raad is veral gepols oor beurtkrag en watter voorbereiding getref is sodat beurtkrag nie die eksamens ontwrig nie. Die uitvoerende hoof van Umalusi, Mafu Rakometsi het tydens die konferensie gesê dat hulle ‘n beroep op skole gedoen het om seker te maak dat daar alternatiewe reëlings is, sou beurtkrag ingestel word.
Hy het ook ‘n beroep op Eskom gedoen om die matriekeindeksamen in gedagte te hou. Hy het verder gesê dat daar ernstig opgetree sal word teen enige leerling wat tydens die eksamen kul. In die verlede is só ‘n leerling se punte weggeneem en verbied om vir ‘n jaar of twee weer die eksamen af te lê.
Rakometsi het ook ‘n streng waarskuwing aan onderwysers gerig indien hulle vraestelle laat uitlek.
Die uitslae sal op 15 Januarie 2024 bekend gemaak word.
