8 April 2024
Eskom het verbruikers in die Wes-Kaap gewaarsku dat daar tans – weens gure weer – ‘n geweldige agsterstand ondervind word om aangemelde foute te herstel.
Die nutsmaatskappy se provinsiale woordvoerder, Kyle Cookson sê uitgerekte onderbrekings word in die Kaapse-metro, dele van die Wes-Kus sowel as die Boland- en Overberg munisipaliteite verwag.
Hy het ‘n beroep op verbruikers gedoen om geduldig te wees te midde van dié vertragings.
Intussen is die Hugenote-tonnel in albei rigtings weer vir verkeer oopgestel nadat dit die naweek gesluit moes word weens sterk wind daartoe gelei het dat voertuie omgewaai is.
Te midde van die wind kon nooddienste daarin slaag om ‘n voertuig wat op die ryvlak omgewaai het, regop te trek en dit van die ryvlak af te verwyder.
Intussen het SANParke vanoggend in ‘n verklaring gesê dat die kabelkarretjies op Tafelberg in Kaapstad steeds gesluit is weens die verwoestende wind. Ander dele van die Tafelberg Nasionale Park is egter steeds oop vir stappers. Die bekende Boulders Beach se pikkewyn kolonie kan ook steeds besoek word. Kaappunt is ook steeds oop.
Vir veiligheidsredes is die Oude- en Nuweland-piekniekterreine gesluit, asook die Deer Park, Rhodes Memorial, en Leeukopstaproetes is gesluit.
SANParke het ‘n beroep op besoekers gedoen om versigtig te wees indien hulle enige van hierdie terreine besoek, hoewel hulle voorstel dat mense eerder die besoeke uitstel.
