30 April 2024
Kliënte en personeel by ‘n Absa-tak in Gauteng was stomgeslaan toe ‘n klant probeer het om ‘n bankrekening oop te maak met ‘n lewendige nonnetjie-uil as deposito.
Die uil se redding was dat die bank die klant meegedeel het dat hulle nié die uil kan aanvaar nie, maar dat daar slegs wettige betaalmiddels aanvaar kan word.
TimesLive berig dat die man eers die uil aan ‘n tradisionele geneser probeer verkwansel het, voordat hy daarmee bank toe is.
Volgens ‘n woordvoerder van Absa het die voorval verlede week by die Westonaria-tak plaasgevind en is die Owl Rescue Centre se hulp ingeroep om die voël te red.
Brendan Murray verbonde aan die sentrum sê so vreemd soos wat die situasie was, het hulle al moeiliker en vreemder reddings uitgevoer. Die uil word tans by die sentrum gehuisves.
