21 Mei 2021
Het jy al ooit iets in ‘n huurmotor vergeet?
Die huurmotordiens, Uber het sy jaarlikse Lost & Found Index uitgereik – wat dié goedere lys wat gereeld in Uber motors vergeet word en ook hoe jy jou besittings kan terugkry.
Dié indeks wys dat Suid-Afrikaners loskop raak aan die einde van die week en veral op Donderdae en Vrydae goed in huurmotors vergeet. Inwoners van Johannesburg is volgens dié lys die mees vergeetagtig, gevolg deur inwoners van Pretoria en Kaapstad.
Die top 10 items wat gereeld deur Suid-Afrikaners in Uber-motors vergeet word is soos volg:
- Selfoon/ kamera
- Sleuters
- Oorfone
- Beursie
- Rugsakke, sakke of pakkies
- Klere-items
- Brille
- Juweliersware, horlosies, grimering
- Kruideniersware
- Skootrekenaars
Uber in Amerika het ook op die indeks melding gemaak van unieke en vreemde voorwerpe, wat al in sy motors agtergelaat is. ‘n Tand, koelerhouer met vis, toiletsitplek en ‘n troeteldier se as is net van dié vreemde besittings, wat Uber-drywers in hulle motors gevind het.
Indien jy jou besittings verloor het kan jy op jou Uber toepassing die drywer kontak om jou verlore item aan te meld.
