23 Julie 2023
Die ANC se sekretaris-generaal, Fikile Mbalula het gister tydens die ANC Vroueliga se verkiesingskonferensie gesê dat die misdaadbestrydingseenheid, die Skerpioene teruggebring moet word.
Dit te midde van hoë misdaadvlakke wat tans in die land ervaar word.
Die Skerpioene is amptelik in Januarie 2009 ontbind na oud-president Jacob Zuma se verkiesing en vervang met die Valke. Mbalula sê dinge in die land sal verander, en meen indien die Valke en die Nasionale Vervolgingsgesag (NVG) dit nié kan regkry nie moet hulle versterk word.
Volgens Mbalula wil dit voorkom asof misdadigers nie meer bang is nie, omdat talle voorvalle van misdaad helderoordag plaasvind. Hy het veral verwys na die VBS Mutual Bank-skandaal waartydens mense geld belê het, en dit verloor het weens korrupsie.
Hy sê die ANC doen nou ‘n ernstige beroep op wetstoepassers om misdadigers in hegtenis te neem, en indien dit nie gedoen kan word nie sál die Skerpioene teruggebring word.
Die Skerpioene was ‘n gespesialiseerde teen-misdaadeenheid van die NVG wat in 2001 deur oud-president Thabo Mbeki op die been gebring is. Hulle doel was om hoëvlak- en prioriteitsmisdade te ondersoek, soos korrupsie.
