9 Desember 2021
Tieners tussen 12- en 17 jaar oud kan van vandag af vir hulle tweede Pfizer-entstof by inentingslokale aanmeld.
Die departement van gesondheid het in ‘n verklaring gesê dat die departement oorval word met versoeke oor wanneer die tweede dosis vir dié ouderdomsgroep beskikbaar sal wees.
‘n Woordvoerder van die departement, Foster Mohale sê tieners wat vir die tweede dosis kwalifiseer sou reeds teksboodskappe ontvang. 680 000 kinders in die ouderdomsgroep is reeds ingeënt en sou aanvanklik net een dosis kry.
Intussen het die departement vroeër vandag gesê dat die gesondheidsproduktereguleerder, Sahpra ook die derde Pfizer-dosis vir mense ouer as 18 jaar oud, goedgekeur het. Dit beteken dat die minister van gesondheid nou kan besluit oor wanneer die versterkingsdosis toegedien moet word.
