12 September 2022
Die Suid-Afrikaanse Gesondheidsproduktebeheerraad, SAHPRA, het bevestig dat ‘n tweede persoon dood is nadat die oorledene Guillain-Barré-sindroom, GBS, onder lede gehad het.
SAHPRA het die eerste soortgelyke sterfte op 4 Augustus vanjaar aangekondig nadat dié pasiënt die Johnson & Johnson entstof teen die virus ontvang het.
Die organisasie se uitvoerende hoof, dr. Boitumelo Semete-Makokotlela, sê die assessering van die geval is behartig deur die nasionale deskundige komitee oor immuniseringsveiligheid en daar is van die Wêreldgesondheidsorganisasie se metodologie gebruik te maak.
Sy sê die sterfte is geklassifiseer as ʼn entstofverwante voorval.
Die pasiënt se simptome strook met dié van GBS en geen ander moontlike oorsaak van GBS kon geïdentifiseer word nie.
Dié uiters seldsame sindroom vernietig die beskermende skede , die miëlien, om die aksone van ʼn pasiënt se senuweeselliggame, die neurone.
Gevolglik kan die neurone nie meer boodskappe van die brein na die ledemate gelei nie en verlamming volg.
SAHPRA hou vol dat die voordele verbonde aan die Covid-19-entstof veel swaarder weeg as die risiko daaraan verbonde. Meer as 37-miljoen entstofdosisse – waaronder nege miljoen dosisse van Johnson & Johnson se entstof – is teen Augustus 2022 in Suid-Afrika toegedien.
