3 Oktober 2023
Twee van die land se voorste kettingwinkelgroepe, Pick n Pay en Woolworths, het begin om die verkope van hoendereiers aan kliënte te rantsoeneer in ‘n poging om ‘n voortdurende aanbod te verseker.
Die stappe is gedoen namate Suid-Afrika se ergste uitbreking van voëlgriep steeds momentum opbou.
Woolworths sê hy beperk aankope van heel eiers in sy winkels tot ses per klant terwyl hy met boere saamwerk om voorraadaanvulling te probeer stabiliseer.
Op sý beurt het Pick n Pay gesê hy vra ook klante om matigheid voor oë te hou en dat hy aankope tot een of twee houers per kliënt sal beperk – afhangende van die streek.
SA se grootste kleinhandelaar, Shoprite sê hy rantsoeneer tans geen eieraankope nie en beplan ook nie om dit binnekort te begin doen nie.
