6 November 2023
Die polisie in Mpumalanga het ‘n deurbraak gemaak met die inhegtenisneming van twee mans wat na bewering betrokke was by die moord op die kleuterskoolonderwyseres, Megan Griesel (20).
Die polisiewoordvoerder, kolonel Donald Mdhluli, sê die eerste verdagte is in Masoyi, buite Witrivier, in hegtenis geneem.
Mdhluli sê die polisie het leidrade opgevolg en die tweede verdagte later in Kanyamazane in hegtenis geneem.
Griesel is dood toe rowers op haar losgebrand het toe sy onwetend verby die toneel van ‘n rooftog by ‘n vulstasie in Lydenburg gery het. Sy was in haar pa se bakkie, en die verdagtes het haar glo aangesien vir veiligheidsbeamptes.
Mdhluli sê die mans staan tereg op ondermeer aanklagte van moord, poging tot moord en sakeroof.
