28 Maart 2022
Die Gautengse LUR vir onderwys, Panyaza Lesufi, het sy skok en medelye uitgespreek met die afsterwe van twee leerlinge van die Hoërskool Birchleigh – in Kempton Park.
Die leerders – onderskeidelik in graad-10 en graad-12 – het vermoedelik verdrink tydens ‘n rugbytoer na KwaZulu-Natal.
Van die spelers het gister saam met onderwysers in die see by Durban se Noordstrand gaan swem waarna ‘n aantal van hulle in die moeilikheid geraak het.
Lewensredders se hulp is ingeroep om hulle na veiligheid te bring, maar daar kon van twee leerders nie rekenskap gegee word nie.
‘n Soektog is deur die Nasionale Seereddingsinstituut en die polisie se soek- en reddingseenheid van stapel laat loop en hulle liggame is vanoggend – sowat twee-kilometer noord van waar hulle geswem het – gevind.
Lesufi sê die departement se sielkundiges is na die skool ontplooi om bystand aan mede-leerlinge te verleen.
