8 Julie 2024
Die Suid-Afrikaanse Uitsaaikorporasie (SAUK) het bevestig dat twee senior bestuurders, wat sedert Februarie geskors is, afgedank is omdat hulle ‘n multimiljoen-rand winsreëling met ‘n digitale kontrak probeer wegsteek het.
Ian Plaatjies, wat sedert November 2019 as die SAUK se bedryfshoof dien, en die hoof van videovermaak, Merlin Naicker se dienskontrakte is met onmiddellike effek beëindig ná ’n dissiplinêre proses.
Volgens die SAUK se uitvoerende beampte vir korporatiewe aangeleenthede en bemarking, Mmoni Seapolelo, het die direksie die bevindinge en aanbevelings van ‘n verslag deur ‘n onafhanklike paneel oorweeg en besluit om dié twee te ontslaan.
Sy sê die SAUK gaan nie meer inligting hieroor bekend maak nie.
Plaatjies en Naicker is in Februarie geskors – ongeveer dieselfde tyd wat die hoof van advertensieverkope, Reginald Nxumalo, bedank het.
Dit het gebeur in die nasleep van hul beweerde versuim om ‘n winsaandeelooreenkoms van 7,5% met Discover Digital bekend te maak wat die openbare uitsaaier se SABC+ videostroomdiens bestuur.
