11 April 2024
Verkeersowerhede in die Moederstad waarsku dat daar vir die volgende drie dae hewige verkeersopeenhopings in die omgewing van die hawe sal wees as gevolg van inkomende passasiersvaartuie – insluitend een van die wêreld se grootste seevaartuie.
In ‘n verklaring sê die stadsraad dat verkeersopeenhopings onder normale omstandighede ‘n kopseer kan wees, maar dat dit die volgende paar dae erger gaan wees.
Die burgemeesterskomiteelid vir veiligheid in dié stad, JP Smith het motoriste gevra om vooraf hul roetes te beplan om te verhoed dat hulle vir lang tye in die verkeer vassit.
Die Queen Victoria meer vandag vas en vertrek Vrydagaand, terwyl die Queen Mary 2, Vrydagoggend verwag word en Saterdagaand vertrek.
