25 Mei 2023
Twee van die Vrystaat se grootste munisipaliteit – die Mangaung-metro in Bloemfontein en Matjhabeng in Welkom het uiters swak gevaar in ‘n toekenningsgeleentheid van Ratings Africa in Midvaal.
Volgens die DA se leier in die Vrystaat, dr. Roy Jankielsohn het die Mangaung-metro ‘n gradering van 24% gekry, in vergelyking met die nasionale metro-gemiddelde van 41%. Die Kaapstad-metro se gradering is 64%. Ook die Tshwane-metro (Pretoria) het ‘n gradering van 24% gekry.
Volgens Jankielsohn is Mangaung se bedryfstekort van R1,9-miljard ‘n groot rede vir die swak gradering. Die Vrystaat se tweede grootste munisipaliteit, Matjhabeng het ‘n gradering van 11% ontvang, en onreëlmatige besteding én bedryfstekorte het grootliks daartoe bygedra.
Jankielsohn meen hierdie graderings plaas opnuut die kalklig op wanbestuur en ‘n tekort aan dienslewering in die Vrystaat.
Naledi (Vryburg) in Noordwes is algeheel die munisipaliteit wat die swakste gevaar het met ‘n gradering van 7%. Matjhabeng en Lekwa (Standerton) in Mpumalanga het ‘n 11% gradering gekry. Die Enoch Mgijima-munisipaliteit in Queenstown in die Oos-Kaap het ‘n gradering van 12%, terwyl Newcastle in KwaZulu-Natal 15% behaal het.
Beide Limpopo se Mogalakwena-munisipaliteit in Potgietersrus en Gauteng se Rand West City het 19% behaal. Die munisipaliteit wat in die Wes-Kaap die swakste gevaar het, is Beaufort-Wes met 21%.
