17 Mei 2021
Die apteekgroepe, Dis-Chem en Clicks het toestemming vanaf die nasionale gesondheidsdepartement gekry om die regering by te staan in fase 2 van sy inentingsprogram.
Fase 2 – wat die inenting van mense ouer as 60 jaar asook dié met onderliggende siektestoestande behels – het vanoggend begin.
Dis-Chem het 32 inentingspersele aangewys vir Covid-19 inentings, met 11 van dié persele, wat reeds vanaf 24 Mei gereed sal wees.
Volgens die groep se nasionale kliniek-bestuurder, Lizeth Kruger sal die elf lokale tussen 500 en 600 mense per dag kan inent. Vyf van dié persele is in Gauteng, een in die Oos-Kaap, Vrystaat, KwaZulu-Natal en
een in die Wes-Kaap.
Die inentings sal nie by Dis-Chem se winkels gedoen word nie weens die entstof wat in koelkaste geberg moet word.
LEES OOK: FASE 2 VAN DIE REGERING SE INENTINGSVELDTOG SKOP VANDAG AF
Intussen sal Clicks inentings by 47 van sy apteke kan toedien. Clicks se handelshoof, Rachel Wrigglesworth sê die apteekgroep wag nog op goedkeuring vir 520 van sy winkels.
Sy sê Clicks se personeellede is opgelei om die inentings te kan toedien.
Clicks se groothandelafdeling, United Pharmaceutical Distributors sal die entstowwe op sy persele in koelkamers hou en na die verskeie Clicks-winkels neem.
Diegene, wat op die departement van gesondheid se Covid-19-portaal geregistreer het vir die entstof sal ‘n SMS-boodskap ontvang met ‘n datum en tyd vir die inenting asook ‘n koepon-nommer, wat saam met die persoon se ID en mediesefonds-inligting (indien van toepassing) by die inentingsperseel ingehandig moet word.
Die inenting by Clicks en Dis-Chem sal ‘n administrasiefooi van R70 kos, maar kan by die gesondheidsdepartement teruggeëis word.
