1 Oktober 2024
Die Tshwane-metro se stadsbestuurder, Johann Mettler het sy personeel berispe, na hulle verlede week fees gevier het met die verwydering van die burgemeester Cilliers Brink.
Mettler het die personeel se optrede in ‘n interne memorandum as uiters swak beskryf. Hy het verder gesê dit was vernederend, onsensitief, afbrekend en beledigend.
Brink is tydens ‘n mosie van wantroue, wat deur die ANC ingedien is, uit die kussings as burgemeester gelig. Dié mosie wat ondersteun is deur die EFF en ActionSA het geslaag met 120 stemme teenoor 87. In ‘n video kan gesien word hoe die werknemers juig, hande klap en dans.
“Werknemers het die reg om met ‘n politieke party van hulle keuse te assosieer, maar Tshwane Huis is ‘n werksplek nie ‘n party-spesifieke politieke ruimte nie,” sê Mettler. Hy sê die werknemers se optrede gaan teen die Tshwane-metro se kultuur van respek, vriendelikheid en empatie.
Hy het werkers gewaarsku dat daar gevolge sal wees indien sulke gedrag herhaal word.
