6 Februarie 2023
38 raadslede in die Tshwane-metro se diensterekeninge is reeds die afgelope drie maande agterstallig.
Die totale skuld wat die raadslede aan die metro verskuldig, beloop R2 117 200,55 met geen betalingsooreenkoms in plek nie. Hierdie inligting word vervat in die agenda van ‘n vergadering van die oorsigkomitee vir finansiële dienste, wat Donderdag (9 Februarie) gehou gaan word, en in Pretoria FM se besit is.
Volgens die agenda het die 38 raadslede se skuld vanaf Desember met 0,01% toegeneem.
Vyf van die raadslede se totale skuld beloop R62 753,73, en het reeds afbetalingsooreenkomste onderteken.
Ingevolge die munisipale strukturewet 32 van 2000 is ‘n verkose raadslid verantwoordelik vir sy eie munisipale rekeninge en mag daar nie ‘n agterstand van drie maande van munisipale belasting, rekeninge vir dienste gelewer of eiendomsfooie wees nie.
Die raadslid, MI Madonsela het volgens die agenda die meeste skuld van meer as R960 000. BK Mathevula se skuld beloop R239 434, terwyl die derde raadslid op die lys, Mina Raphuthi Maboshadi meer as R100 700 skuld.
Foto: Rekord East
