Die DA in die Tshwane-metro sê die metro se oortydbeleid kos die stad ‘n verlies van R130-miljoen, maar tog bly inwoners in die donker.
Dit kom te midde van ‘n geskeduleerde kragonderbreking wat gister tussen 09:00 en 13:00 moes plaasvind, maar wat toe veel langer aangehou het met sommige woonbuurte in die ooste van Pretoria wat se kragtoevoer eers laat gisteraand herstel is.
Daar is steeds sommige woonbuurte wat nié kragtoevoer het nie.
Die DA se woordvoerder oor finansies in die Tshwane-metro, Jacqui Uys meen weens onbekwaamheid en swak vakmanskap beleef Pretorianers nou veel meer kragonderbrekings as toe beurtkrag gegeld het.
Volgens Uys is die herhaaldelike kragonderbrekings problematies aangesien die ANC se nuwe oortydbeleid beteken dat werkers nié na-ure mag werk aan nood kragonderbrekings nie.
Sy sê die ANC voer aan dat hulle die oortydbeleid aangepas het om geld te spaar, maar kragonderbrekings het die metro nét in April vanjaar R130-miljoen gekos.
“Die DA ondersteun die verantwoordelike bestuur van oortyd, maar meen daar is verskille wanneer noodsituasies ter sprake is.”
Die beplande instandhouding het misluk wat beteken dit moet uitgestel word.
