Tshwane-metro samel 98% van sy beoogde begroting in

Die Tshwane-metro sê hy kon in die 2024/2025-boekjaar 98% van sy beoogde begroting insamel.

Die adjunk-burgemeester en burgemeesterskomiteelid vir finansies, Eugene Modise sê danksy inwoners se ondersteuning kon die metro R40,5-miljard insamel van die R41,3-miljard wat hy beoog het.

Modise sê hierdie prestasie beklemtoon die metro se pogings om finansiële stabiliteit in die metro te verseker.

Hy sê in Junie vanjaar is ‘n rekord van 106% van sy maandelikse teiken in inkomste ingevorder.

Die metro kon R3,6-miljard insamel teenoor sy teiken van R3,4-miljard vir Junie. Dit is ‘n surplus van R205-miljoen.

Modise sê hierdie surplus het die jaarlikse tekort verminder van R989-miljoen na R784-miljoen wat volgens hom die Tshwane-metro se finansiële vooruitsigte versterk.

Hy het die betalende inwoners van die stad bedank, en meen hulle is verantwoordelik vir ‘n meer volhoubare-metro wat dienste betyds en goed kan lewer.