21 Desember 2021
Die Tshwane-metro se gesondheidsdepartement het sy kommer uitgespreek oor die hoë Covid-besmettingskoers onder sy gesondheidsorgwerkers.
Die burgemeesterskomiteelid vir gesondheid, Rina Marx, het bevestig dat meer as 200 gesondheidsorgwerkers sedert die begin van November Covid-positief getoets het. Sowat 60 van hierdie groep is tans in selfafsondering.
Marx sê dit skep rede tot kommer, omdat die stad se gesondheidsorgwerkers ’n noemenswaardige rol speel in die stryd teen Covid-19. Marx meen hulle is nie net daarmee getaak om pasiënte te behandel en te versorg by hospitale nie, maar hulle is ook op die voorgrond wat betref die opvoeding van die publiek oor die virus en is ook verantwoordelik vir die toetsing van inwoners.
Marx sê verder dat die gesondheidsorgwerkers die hart van die hoofstad se Covid-19-bestuurstrategie is.
Die Tshwane-metro het opnuut ’n beroep op sy inwoners gedoen om hul deel te doen om die verspreiding van die virus te help keer deur aan die veiligheidsmaatreëls gehoorsaam te wees, soos om sosiale afstand te handhaaf, maskers te dra en hul hande gereeld te ontsmet.
Fotokrediet: Getty Images
