20 Januarie 2022
‘n Spesiale ontbytgeleentheid is vanoggend deur die departement van basiese onderwys in The Houhgton hotel in Johannesburg gehou, vir die matriekklas van 2021 se toppresteerders.
Die minister van basiese onderwys, Angie Motshekga meen om as ‘n toppresteerder erken te word is ‘n groot mylpaal. Volgens haar is die 2021 matrikulante in ‘n klas van hulle eie, gegewe die feit dat hulle deur die ergste van die Covid-19-pandemie gegaan het.
30 matriekleerlinge, van die byna 800-duisend wat die eksamen afgelê het, is vanoggend vereer. Die minister het ook onderwysers en ouers bedank vir hulle volgehoue ondersteuning. Sy meen die land se toekoms en hoop rus op die skouers van die 2021 matriekklas.
Volgens haar het 733 917 voltydse matrikulante die matriekeksamen afgelê. Die res van die uitslae sal vanaand om 18:00 deur Motshekga bekend gemaak word, waarna dit na verwagting môre in koerante gepubliseer sal word.
