30 April 2021
Die burgerregte-organisasie AfriForum sê hy is teleurgesteld in die uitspraak wat landdros Ben Mtebele vanmiddag in die Potchefstroomse Streekhof gelewer het in die saak waar die speaker in die parlement, Thandi Modise op aanklagte van dieremishandeling verskyn het.
In 2014 het die Nasionale Raad van Dierebeskermingsverenigings, oftewel NRDBV talle uitgehongerde en dooie diere op Modise se plaas buite Potchefstroom gevind.
AfriForum se teleurstelling kom nadat Modise se regsverteenwoordiger, advokaat Dali Mpofu, gister ’n artikel 174-aansoek ingevolge die Strafproseswet gebring het. Mpofu het aangevoer Modise moet onskuldig bevind word op alle aanklagte teen haar omdat sy glo nie geweet het van die toetand waarin die diere was nie.
Mtebele het die saak teen Modise ter syde gestel.
Die hoofondersoeker by AfriForum se privaatvervolgingseenheid, Andrew Leask sê die eenheid is van mening dat daar genoegsame gronde is om teen die uitspraak te appelleer en het reeds opdrag ontvang om daarmee voort te gaan.
Die direksievoorsitter van die familieboerorganisasie Saai, dr. Theo de Jager, sê die afloop van die saak skep groot verwarring in die landbousektor oor waar die aanspreeklikheid en verantwoordelikheid van veeboere ten opsigte van dierewelsyn lê.
