15 April 2023
Die departement van korrektiewe dienste sê daar is geen dreigemente teen die sogenaamde Facebook-verkragter, Thabo Bester nie.
Bester het gister in die Bloemfontein landdroshof verskyn nadat hy en sy vriendin, dr. Nandipha Magudumana vroeg Donderdagoggend uit Tanzanië in Suid-Afrika aangekom het. Bester, wat in 2012 tot lewenslange gevangenisstraf gevonnis is, het in Mei 2022 uit die Mangaung korrektiewe sentrum ontsnap.
Hy het tydens sy hof verskyning gister gesê dat hy vir sy lewe vrees en dat hy sedert die 24 uur voor sy verskyning niks geëet het nie.
Die departement sê egter in ‘n verklaring dat Bester se bewerings ongegrond is omdat hy eet en veilig is in die Kgosi Mampuru-gevangenis in Pretoria.
Magudumana, die kringtelevisie-tegnikus, Teboho Lipholo, Magudumana se pa, Zolile Sekeleni en ‘n voormalige G4S-tronkbewaarder, Senohe Matsoara sal Maandag saam in die hof verskyn. Bester se saak is tot 16 Mei uitgestel.
