13 April 2023
Die sogenaamde Facebook-verkragter, Thabo Bester en sy vriendin, dr. Nandipha Magudumana is vroeg vanoggend terug na Suid-Afrika gebring.
Die twee het vanoggend op die Lanseria-lughawe in Johannesburg geland, nadat hulle die afgelope naweek in Tanzanië in hegtenis geneem is.
‘n Polisievoertuig het hulle by die vliegtuig opgelaai. Bester het in Mei verlede jaar uit die Mangaung Korrektiewe Sentrum in Bloemfontein ontsnap nadat hy sy eie dood nagemaak het. Die privaat veiligheidsmaatskappy, G4S bedryf die gevangenis.
Bester is die Facebook-verkragter gedoop omdat hy die platform gebruik het om sy slagoffers te lok, verkrag en beroof. Hy het minstens een moord gepleeg en is 2012 tot lewenslange gevangenisstraf gevonnis.
Intussen het die polisieminister, Bheki Cele en die minister van justisie en korrektiewe dienste, Ronald Lamola vanoggend terugvoer gegee oor Bester se terugkeer na Suid-Afrika. Bester is na die Kgosi Mampuru korrektiewe sentrum in Pretoria geneem, en Magudumana is in polisie-aanhouding voordat sy vanoggend in Bloemfontein in die hof verskyn. Sy word van medepligtigheid tot ontsnapping en moord aangekla.
Vyf mense is nou in verband met die voorval in hegtenis geneem, insluitend Bester en Magudumana.
Volgens die nasionale kommissaris van die departement van korrektiewe dienste is Bester onder 24 uur waarneming.
