17 September 2024
Die veroordeelde moordenaar en verkragter, Thabo Bester het ‘n hofaansoek ingedien waarin hy toegang tot ‘n skootrekenaar versoek om glo voor te berei vir sy komende strafsaak.
Sy aansoek is vandag in die hooggeregshof in Johannesburg aangehoor. Volgens hom het hy nie toegang tot enige inligting nie en vra daarom vir internetverbinding én ‘n daaglikse koerant.
Bester – wat tans teregstaan op aanklagte dat hy in Mei 2022 uit die Mangaung-korrektiewe sentrum in Bloemfontein ontsnap het – het saam met sy meisie, Nandipha Magudumana, na Tanzanië gevlug.
Hulle is in hegtenis geneem en na Suid-Afrika gedeporteer.
Dié verhoor – waar verskeie tronkbeamptes saam met Bester en Magudumana aangekla word – is vir 10 Februarie volgende jaar op die hofrol geplaas. Bester word tans by die Kgosi Mampuru II-tronk in Pretoria aangehou.
Foto: Gauteng Tourism Authority
